حملة انقذوا اطفال الشوارع

الصدفة تلقى بنا امام الهارب عمر

عمر فى سن الـ 16 يريد الهروب من المنزل ولكنى قابلته بالصدفه انا و ابن عمى تحدث إلينا بكل سذاجه

- جاى منين يا عمر-

هربان من الشغل النهارده روحت شربت سيجارتين حشيش فى كفر عصام وجيت-

وهربان ليه ؟

- اصلى بقالى اسبوع مبروحش لما روحت للأسطى قالى روح يابنى مش عاوزك معايا والأسطى دايماً كان بيضربنى ويبهدلنى ويطلع عين امى فى الشغل-

طب ما تروح لأمك ؟-

لو روحت حتطردنى من البيت عشان مش شغال زى كل مره واروح لخالتى ولعمتى و خالى بردو بيطردونى واخواتى بيضربو فيا زى ما يكون بيضربوا فى حمار...بس عارفين اخويا محمد اغشم من اخويا اسامه بمليون مره بيضربنى جامد اوى وايده غشيمه اوووى-

طب هما بيضربوك ليه ؟

عشان مش شغال...هوا انا لو نمت فى العربيه دى حيحصلى حاجه ؟-

روح يا عمر نام فى بيتك- اخويا محمد هناك حيضربنى جامد...
عارف ابويا لو كان عايش مكنش حد يقدر يمد ايده عليا ..

ابويا الله يرحمه كان مدلعنى.

... الله يرحمه...منا روحت للاسطى على الصبح واشتغلت عنده

- انت بتعمل ايه يعنى لما بتهرب ؟

- بلف فى الشوارع اقعد عند دا شويه ودا شويه وكدا-

بتلف مع مين يعنى ؟

- بلف مع نفسى

.- بتاكل فين ؟
- مبكلش...النهارده عند الأسطى على روحت شويه الصبح واحد زبون إدانى خمسه جنيه جبت بيها علبة كشرى

- عندك كام سنه يا عمر ؟

- 16

- طلعت بطاقه؟
- اطلعها إزاى يعنى حيكتبلى بدون شغل حيجى اى ظابط ابن ... يحبسنى فى البوكس .- انا بندم وربنا انى سبت التعليم كان نفسى اتعلم

- مش انت اللى اخترت يا عمر تسيب التعليم ؟

- اه ... انت عارف الإنجليزى دا مكنتش بفهم فيه حاجه سقطونى فى كل المواد إلا الإنجليزى...يا بخت العيال الصغيره والشباب اللى زيكوا...قاعدين فى بيتكوا بتناموا وتاكلو وتشربوا ولا فى دماغكوا شغل او حاجه

- مين قالك كدا احنا شغالين وبنتعب هوا يعنى عشان اللبس النضيف شويه؟؟

- يلا بقى انا حروح الف ـ

ـونستمر فى السؤال ؟

من المذنب فى حق عمر ؟

هل انا ؟

انتم ؟

نحن ؟

امه ؟

اخوه ؟

الأسطى ؟

الشارع ؟

الحكومه ؟

التعليم ؟

لقد ولد هذا الموضوع فى نفس عمر الحقد تجاه من يعيشون افضل منه وهذا يولد عمليات القتل التى تحدث فى شارعنا فمن الممكن جداً ان نسمع فى الغد عن جريمة قتل تحدث على يد عمر لإحدى الأطفال الذى يحقد عليهم عمر ليس له إصدقائه ... ليس له اب ... ليس له اخوه .. ليس له غير الله سبحانه وتعالى .عمر ليس لديه كمبيوتر ليكتب لنا من خلاله مشكلتهفكيف سنشعر بمشكلته إذا لم يكن هناك امثالى لنكتب عن مشاكل هذه البلد.